Ég held að vorið sé að breytast í sumar

Ég held að vorið sé að breytast í sumar það sagði veðrið mér í dag hér í Laugardalnum og ég horfði líka á hitatölurnar á Austurlandi. Mér varð hugsað til systur minnar ekki varð þó af því að ég hringdi til hennar. Hún er núna hætt að snúast í kring um ær og lömb og farin að snúast í kringum sumargesti. Það stendur nokkurn veginn á endum. Ég hef svo sem líka haft í mörgu að snúast. Á föstudaginn tökum við barn í gistingu, á laugardag fórum við á djasstónleika og í dag ætlaði ég að taka ærlega til í íbúðinni. Þeirri áætlun var þó breytt í skyndi þegar ég vissi að von væri á Oddnýju mágkonu minni (Texasfara) í morgunmat. Í stað vorhreingerningarinnar áttum við notalega samverustund og gengum saman í sólinni.

Síðari hluta dagsins notaði ég til gera hraðvorhreingerningu. Ég lagaði til í bókahillunni og þreif svalir og svefnherbergi. Ánægðust er ég með tiltekt mína  á svölunum og nú er ekkert sem mælir gegn því að bjóða næsta morgungestum í morgunkaffi þar úti..