Vorið er á leiðinni

Vorið er á leiðinni. Það voru útsprungnir krókusar í garðinum hjá Þórði syni mínum í dag. Þar voru líka tvö börn nýbúin að eiga afmæli, Ísold þriggja og Breki tíu. Það er mikið að gera hjá þeim á Spítalastígnum og alltaf eitthvað nýtt sem mætir auga. Í dag var það auk krókusanna og afmælisbarnanna nýtt veggfóður í art nouvaux stíl. Auk þess er hann búinn að láta bólstra forláta stól í sama anda. Vandamálið er að kettirnir á heimilinu eru afar hrifnir af þessu húsgagni en nýja áklæðið er of viðkvæmt fyrir aðdáun þeirra svo það verður að hylja það með ábreiðu. Það gerir manni gott að horfa á vandamál af þessum toga.