Kuldi er afstæður

 Myndin af landslaginu í Byriatíu er líklega tekin að sumarlagi og hún gæti alveg eins verið frá Íslandi. Skjaldarmerkið er aftur á móti ólíkt okkar þó ég kannist við ákveðin tákn þar. Var ekki risinn að austan (Lómagnúp) með hamar og sigð?

Það er mikið talað um kuldann en þegar ég kem út í bíl þarf ég að kíkja á mælinn í til að trúa því að það sé í raun og veru frost. Nú eru 90 ár síðan 1918, þá hefði mátt fara Sundaleiðina á bíl án brúar. Ég veit ekki hvort það var ekið á ísnum. Sonur minn var í dag að senda mér nútímasímskeyti frá Byriatiu. Hann var á leiðinni til Irkutsk. Ekki minntist hann neitt á veðrið en ég held að það sé kalt þar.

Skipulagsmál

Ef það á endilega að stytta veginn vil ég fá brú en ekki göng og það þarf að gera ráð fyrir gangandi og hjólandi ferðalöngum. Mér finnst gönguferðir vera skemmtilegasti ferðamátinn og ætla að gefa mér meiri tíma í framtíðinni til að ganga. En hvern langar til að ganga niðri í jörðinni nema þá til að skoða hella?