Hvers eiga Breiðdælingar að gjalda?

Væri ekki ráð að bæta vegasamgöngur í Breiðdal um leið og ráðist er í vegabætur framhjá þessum fallega dal. Vegir eru allt of mikið hugsaðir út frá fólki sem er að flýta sér og hefur ekki tíma til að njóta. Til hvers er fólk eiginlega að ferðast ef fólk gefur sér ekki tíma til að horfa út um gluggann og staldra við og slóra. Ég get reyndar vel unnt Berfirðingum þess að fá greiðfærari veg yfir Öxi, sem er líka falleg. Það er orðið langt síðan að Hjálmar í Fagrahvammi ruddi þennan veg með  litlu jarðýtunni sinni. Ég heyrði söguna um að hann lægi  úti og segðist fá leiðsögn frá álfkonu um vegastæðið. Fólk hafði áhyggjur af því að hann væri að verða ruglaður. En þannig var leiðin yfir Öxi gerð bílfær. Um svipað leyti lagði Páll á Gilsárstekk það til á fundi að það væru gerð göng úr Breiðdalnum yfir í Berufjörð (göng til að lækka leiðina yfir Berufjarðarskarð), en hann fékk ekki hljómgrunn með þá tillögu enda var hann á undan sinni samtíð í þetta skipti.

Nú á ég því miður ekki leið nema einu sinni til tvisvar á ári í Breiðdalinn og fer þá alltaf suðurleiðina svo þykir ótrúlegt að ég eigi nokkurn tíma eftir að fara yfir Öxi, því ég á aldrei erindi framhjá Breiðdalnum.