Síðasti dagur ársins

Síðasti dagur ársins er titill á bók eftir Normu Samúelsdóttur (eða var Næstsíðasti dagur ársins?). Það var dapurleg bók. Minn síðasti dagur ársin var góður dagur. Við erum boðin í mat í kvöld og því þarf ég ekki að hafa neitt fyrir kvöldinu og gera einungis það sem mig hefur lengi langað að gera. Ég hugsa mig vel um og kemst að því að mig langar mest til að dútla, svlítið við tiltektir (ýmislegt sem hefði átt að gera fyrir jólin) strauja, gera við saumsprettur og síkka baðherbergisglugggatjöldin. Þau hafa farið í taugarnar á mér í ár en ég keypti þau fyrir jólin í fyrra. Eiginlega ætti baðherbergisgluggatjöldin að vera í eintölu því þetta er bara ein gardína. Ég tók fram strauborðið og saumavélina og gerði við. Það er fátt skemmtilegra en að laga það sem er bilað. Ég finn að það skapar hjá mér sérstaka vellíðan. Af hverju geri ég þetta svona sjaldan?

Á meðan ég var að sauma yfirfór ég í huganum bækurnar sem ég hef verið að lesa um jólin og velti fyrir mér hvort ég gæti komið mér upp einhvers konar stöðluðu mati og hvað slíkt mat skyldi þá innihalda. Ég ákvað að gera tilraun með að meta þær alltaf út frá þrenns konar viðmiðum. Skemmtileg, athyglisverð og nærandi fyrir sálina. Nú þegar ég set þetta á blað sé ég að það væri betra að hafa þetta í senn eigindlegt og megindlegt, svo ég ætla að gera tilraun með að gera það þannig og nota skalann 0-5. Þá verður matið svona:

Minnisbók Sigurðar Pálssonar

• Skemmtileg 4
• Athyglsisverð/fræðandi 2
• Nærandi fyrir sálina 1

Himinn og helvíti, Jón Kalmann

• Skemmtileg 4
• Athyglisverð/fræðandi 5
• Nærandi fyrir sálina 5

Sverrissaga í umsjón Þorleifs Haukssonar (Íslensk fornrit)

• Skemmtileg 5
• Athyglisverð og fræðandi 5
• Nærandi fyrir sálina 3

Ég þarf að blogga sérstaklega um Sverrissögu síðar

Tímavillt eftir Berglindi Gunnarsdóttur

• Skemmtileg 4
• Athyglisverð og fræðandi 3
• Nærandi fyrir sálina 5

Veruleiki draumanna eftir Ingibjörgu Haraldsdóttur

• Skemmtilleg 4
• Athyglisverð/fræðandi 2
• Nærandi fyrir sálina 2

Ég sé núna að þegar ég er búin að prófa þetta mér finnst erfitt, sérstaklega megindlegi hlutinn. Kannski ætti ég ekkert að vera að því?

Loks fórum við hjónin í gönguferð út á Seltjarnarnes. Það gerðum við líka í fyrra á gamlaársdag og líklega árið þar áður og þar áður. Ég hugleiddi hvað ég er heppin að vera enn á lífi en það gerði ég alveg áreiðanlega ekki í fyrra.

 

Athugasemdir

[Erling Ólafsson (IP-tala skráð) 2.1.2008 kl. 09:56]

Skemmtilegt blogg.    Hvaða sál er þetta sem þú ert að tala um????  Hvað eigum við að borða í kvöld ???

kv. EÓ.