Skírnir, alltaf góður

Ég er áskrifandi að Skírni og les hann. Hann svíkur aldrei. Oft tek ég Skírni með mér í sumarferðalagið ef ég fer þá eitthvað en nú þjófstartaði ég og er þegar búin að lesa þrjár greinar. Fyrst las grein Halldórs Guðmundssonar um Landnám, bók Jóns Yngva. Þetta er góð grein eins og við er að búast, bætti kannski ekki svo miklu við það sem áður var komið en ég er forvitin um Gunnar Gunnarsson.

Því næst las ég grein Hjalta Hugasonar um áfallatengd álagseinkenni Guðmundar góða. Það virðist vera að færast í vöxt að skoða ýmsar persónur sögunnar út frá greiningar- og meðfræðilegum aðferðum nútímans. Hjalti fer í gegn um sögu Guðmundar góða í þessu ljósi. Þetta er lærð grein og mér fannst gaman að rifja upp söguna en verð að viðurkenna að ég hafði kannski heldur þegið að fá leiðsögn í ljósi kenninga og hugmynda guðfræði þess tíma því þar er ég illa að mér. Ég hef mínar efasemdir um vísindalegt gildi ýmissa greininga dagsins í dag og enn meiri efasemdir um gildi þeirra aftur í tímann.

Loks las ég grein Helgu Kress um um skáldskapinn, konuna og landið í ljóðum Jónasar Hallgrímssonar. Þetta er skemmtileg grein, það er alltaf gaman að fá tækifæri til að rifja upp snilli þessa frábæra skálds. Mér virðist  sem Jónas sé ekki bara kvenlegur í sýn sinni í skáldskapnum heldur er sem skáldskapurinn, konan og landið (Ísland) renni saman í eitt. Og af því ég las grein Helgu á eftir grein Hjalta Hugasonar og er nýbúinn að hlýða á greiningar Óttars Guðmundssonar á persónum Njálu og fleiri sagna, fór ég að hugsa: Getur ef till verið  var Jónas Hallgrímsson hafi verið kona í karlannslíkama? Nú er ég nota nútíma greiningarfræði á gamlan tíma. Getur þetta ef til vill skýrt af hverju presturinn á Stafafelli segir um Jónas að hann sé "vesæll og aumkunarverður."

Nei, þetta er óábyrgt og ljótt að hugsa svona og engan veginn í takt við þessa ágætu grein Helgu enda tortryggi ég greiningaráráttuna í nútíð og fortíð og leiðist þegar slíkir stimplar eru notaðir. En Skírnir stendur allt af fyrir sínu og ég hlakka til að lesa fleiri greinar