Håkon Nesser

Var að ljúka við bók eftir sænska rithöfundinn Håkon Nesser. Ég set mig ekki úr færi að lesa bækur Håkon Nesser ef ég kemst í tæri við þær og nú hafði maðurinn minn keypt bók eftir hann. Bókin heitir á sænsku Maskarna på Carmine Street. Nesser er þekktastur fyrir bækur sínar um Van Veeteren lögreglufulltrúa og seinna fornbókasala.

Þessi bók fjallar um tvo listamenn, hjón, frá ónafngreindu landi í Evrópu sem flytja til New York eftir að hafa orðið fyrir þeirri óhuggulegu reynslu að einkabarni þeirra er rænt. Þau ætla að reyna að vinna sig frá sorginni og byrja nýtt líf. Það er maðurinn sem er rithöfundur sem segir söguna. Sagan er framan af mjög læsileg eins og Nessers er von og vísa, frásögnin er hæg og lýsingar á fólki, atburðum og atburðum afar grípandi og sannfærandi. En allt í einu kveður við annan tón. Sagan verður hröð, frásagnirnar ágripskenndar og það er nær ómögulegt að fylgja höfundi. Lesandinn er eiginlega skilinn eftir og verður að sætta sig við að það er einhvern veginn hraðspólað í gegnum ótrúlega atburðarás og málið er leyst. En bókin var u.þ.b. 85% góð og ekta Nesser ef það er hægt að reikna það út frá því hvenær maður hætti að þekkja gamla góða Nesser.

javascript:tinyMCE.execInstanceCommand('mce_editor_0','mceMblImage');