Finnski hesturinn eða Gráni úr Fjallaeyvindi

Við hjónin fórum í kvöld í leikhús til að sjá Finnska hestinn. Við erum með fasta miða í áskrift. Ég hef fyrir löngu ákveðið að láta mér ekki leiðast í leikhúsi, bæði er að það kostar sitt að fara í leikhús og svo er skemmtilegra að horfa á sýningu með jákvæðu hugarfari en að láta sér leiðast. En....

Af hverju var Gráni brúnn og af hvaða skít var maðurinn eiginlega að dreifa, hann var jú fyrir löngu hættur með kvikfénað? Og hefði þessu fólki vegnað eitthvað betur ef Finnland hefði ekki gengið í Evrópusambandið? Brandararnir voru jú allir á kostnað þess. Eða var kannski eitthvað að uppsetningunni sem gerði að hún virkaði ekki á mig? Eða er eitthvað að mér? Ungu stúlkurnar voru einu lifandi verurnar á sviðinu. Karlmennirnir tveir lifnuðu aldrei við og ég veit ekki hvað það var með ömmuna og mömmuna sem gerði að þær töluðu eins og út í loftið. Hefði ekki verið betra að setja upp leikritið um Höllu og Fjallaeyvind, þar bjargaði þó Gráni því sem bjargað varð.

Það vantaði sem sagt eitthvað í þetta til þess að ég tæki mark á því. Kannski hefði verið gott að spóla svolítið til baka og skoða það sem Jökull gerði? En ég hef sem sagt ákveðið það með sjálfri mér að njóta þess að fara í leikhús. Nú get ég bara sagt; mér leiddist ekki beinlínis og síðari hlutinn var betri en sá fyrri. Og senan með ungu stúlkunum þegar þær komu niður stigann og sungu um Lúsíu var dásamleg.