Austfjarðafjöllin

Austfjarðafjöllin svíkja aldrei. Stundum kúra þau að vísu á bak við þokuna og eru ekki til sýnis fyrir ferðalanga en þau fara ekkert. Nú er ég komin til baka úr vel heppnaðri Austfjarðaferð með fjallasýn allan tímann þrátt fyrir rigningarspár. Reyndar hefðu Austfirðingar fagnað rigningu því það er orðið ansi þurrt fyrir gróðurinn. Við vorum fjórtán manna hópur með aðsetur í Norðurdal (Breiðdals) og notuðum tímann til að ganga, lesa, veiða og borða og svo auðvitað tala og syngja því það var undirleikari með í för. Við lásum Breiðdælu (eldri og yngri), bók Emils Björnssonar, Af misjöfnu þrífast börnin best, sem Emil meinar reyndar ekki og fleiri, fleiri, árgana af Múlaþingi auk margs annars.