Erum við ekki í lagi, Íslendingar?

Erum við ekki í lagi Íslendingar? Af hverju þarf ein vitleysan að taka  við af annarri og af hverju eiga bara allir að vera ánægðir og ekki segja neitt. Enn hefur þöggunin farið í gang. Ef maður opnar muninn fær maður að heyra að skopskynið sé ekki í lagi og maður skilji ekki samtíma sinn. Þannig var þetta líka þegar útrásin svokallaða tröllreið öllu. Margoft varð ég fórnarlamb þöggunarmaskínunnar.

Er ég þá ekki ánægð með að Sjálfstæðisflokkurinn og Framsókn fái frí? Jú vissulega en ég er ekki ánægð með gagnrýnislausa hjarðhegðun hver sem á í hlut. Það er t.d. ekki í lagi að tilkynna um myndun meiri hluta áður en niðurstaða er fengin í málefnasamning og hvaða leið menn hyggjast fara við að reka borgina. Það er heldur ekki í lagi að ræða ekki við VG um hugsanlega aðild þeirra að nýjum meiri hluta. Ef einhver alvara er með að leggja sig fram um að móta nýja og betri borg væri svo sannarlega styrkur í því að hafa Sóleyju með.

Það er heldur ekki í lagi að væntanlegur borgarstjóri segi okkur bara si sona þegar hann er spurður að hann ætli að vera skemmtilegur borgarstjóri. Honum getur að vísu fundist það skemmtilegt og skemmt sér, en það er ekkert víst að mér og e.t.v fleirum finnist það sama. Þannig er þetta nefnilega með grínið. Það er hægt að segja brandara í hið óendanlega en það eru áheyrendurnir sem ákveða hver er fyndinn. Ekki brandarakallinn.

Ég skora því á alla sem lesa þennan pistil að passa sig á hjarðhegðun og láta ekki þöggunarmaskínuna segja sér fyrir verkum. Munið: Að vera neikvæður út í hið slæma er að vera jákvæður.