Langar nætur Camillu Collette

 

Ég lærði dönsku eins og flestir Íslendingar og þess vegna finnst mér ég geta bjargað mér á Norðurlandamálunum. Reyndar er kannski fullmikið sagt að ég hafi lært dönsku en ég lærði að lesa hana og gat skrifað þokkalega stíla, en þegar við fengum kennara sem kunni að tala hana með réttu tónfalli, hlógum við að honum. Síðar átti ég eftir að búa eitt ár í Noregi og fjögur í Svíþjóð. 

Ég rifja þetta upp vegna þess að ég stend mig að því að kunna ekki nóg, hafa ekki lært. Reyndar les ég mikið á öllum þessum málum en núna þegar ég sit með ljóðabók á nútímanorsku vantar nokkuð á að ég geti notið hennar til fulls.  

Þetta er bókin Camillas lange netter eftir Monu Høvring, en þessa bók tilnefndu Norðmenn til bókmenntaverðlauna Norðurlandaráðs 2014. Bókin er lítil falleg ljóðabók sem byggir á ævi skáld konunnar og kvenréttindakonunnar Camillu Collette. Camilla var 19. aldarkona (fædd 1813, dó 1895), samtímakona Fredriku Bremer (1801 - 1865) í Svíþjóð. Grímur Thomsen var skáldbróðir hennar hér en ég man ekki eftir konu hérlendis sem ég gæti nefnt sem hliðstæðu hennar sem kvenréttindakonu frá þessum tíma. 

Ég hafði aldrei heyrt á þessa konu minnst þegar þetta litla kver barst af tilviljun inn á heimili mitt. En ég las mér til og varð heilluð. Camille (fædd Wergeland) skrifaði bækur og barðist fyrir réttindum kvenna. Hún var systir skáldsins Wergelands og elskaði óvin hans og keppinaut Welhaven. Ég hafði reyndar heyrt á þess karla minnst en aldrei lesið neitt eftir þá. En aftur að ljóðabókinni.

Camilla hafði sjálf skrifað bók sem hét Camillas lange netter, í henni fjallar hún um líf sitt. Það má segja að Mona yrki upp þessa bók og færi hana til okkar.  Þetta er  hrífandi lesning. Mikið finnst manni alltaf merkilegt þegar rödd höfundar hljómar til manns frá löngu liðnum tíma og hittir mann í hjartastað. Ég vildi að ég ætti þessa bók á íslensku, hún minnir mig svolítið á bók Gerðar Kristnýjar,Blóðhófnir.

Ég er þakklát fyrir þessa bók. Hún er hvalreki. Ég vona að hún verði þýdd. Hvernig væri að spara sér að þýða og gefa út eina glæpasögu og gera langar nætur Camillu að jólanóttum?